“مرام”حكايه طفله دمياطيه وعمليه اللحميه تجعلها جثه بعد انفجار الدماء من فمها

13010719_10207245723353737_4241453960299239304_n

كتب :

كتب : ابراهيم المتبولي دمياط 

كتبت والد ضحيه في دمياط يدعى محمد مقلد شكوى عبر صفحته على الفيس بوك مناشدا الجهات المسئوله اين حق ابنته “ماته مرام ماته زهره عمري وحياتي ماتت الدنيا  بفراقك يا جنتي ونعيمي ولا نقول الأ ما يرضي ربنا ان لله وان الية راجعون
يوم الإربعاء من الاسبوع الماضي ذهبنا لإجراء عمليه اللحميه عند الدكتور علاء ا ل ك  و نحن بالعيادة سالته هتعمل اللوز كمان قالي لما أدخل وأشوف الوضع أيه قولتة اللى أنت شايفة أعمله أنت الدكتور وسالنى هى بتلتهب قولتة إنها بتاخد و تيدى عادى قالي لما نفتح وأشوف دخلت العمليات حوالي 35 دقيقه و خرجت وعملها اللوز كمان سالناة اية الأجراء رد قالا  لمامتها الدلع ممنوع تأكليها غصب عنها أول يوم ايس كريم ومثلجات اعملى حسابك حتبقى فية حرارة وكحه وقئ و تقولك زورى بيوجعني موش عاوزة اكل أكليها غصب عنها و كتبلها مضاد حيوي 500 مع بروفين كل 6 ساعات بس يوم الخميس أتصلت بية وقولتلة مرام سخنة 38 درجه ونصف و بعملها كمادات قالي كمادات لا إديها البروفين  

ويوم السبت أتصلت بية تانى يا دكتور فيه حرارة وكحه جامدة نيجى لحضرتك رد وقال ميعادنا الثلاثاء و أدوها برونكفين شراب و الاحد يوم الفاجعه السابعة صباحا بجهز علشان أذهب لمدرستى سمعتها كحت وصوت امها الحقنى ونافوره دم من فمها كأنك دبحت خروف خرج دمة دفعة واحدة خدتها وجريت الى الصاله ادروخت مني فى خلال 5 دقائق وصلنا المستشفى العام (بالسيارة وانا بجوار المستشفى موش بعيد ) بس قبل ما نوصل المستشفى زوجتى قالتلى مرام ماتت ودخلنا المستشفى الدكاترة اتلموا عليها والتمريض ومن خلال الباب متوارب شايف الدكتور بيضغط بكفية على صدرها والقلب لا يستجيب ويعطوها فى حقن ومحاليل وكل منسال حد خارج من جوه يقول بنحاول معاها بس الساعه حوالى 8 بلغونا الخبر أنهرت وقولت للدكتور لية ماتت لية قالى ده من جرح العمليه ولكن لما زوجتى صوتت وقالت عاوزة الكلام ده رسمى الدكتورخاف وراح لأمين الشرطة اللي في المستشفى وقالوا أعمل محضر رسمى ومعتش رضا يتكلم و اتنازلت في النيابه عن اي إتهام للدكتور علشان مرام متتدخلش التلاجه و تتشرح من الطب الشرعي وده طبعا بعد ما خيرونى عاوز تتهم الدكتور يبقى لازم البنت تتشرح قلبي مطوعنيش أن بنتى تتقطع أو تتنازل ونخلص إجراءت الدفن  وانا جنب بنتى في عنايه الطواري استحلفت الدكتور وعرفتة انى أتنازلت رسميا.

أنه يقولى الحقيقه قالي أما ان فيه وريد او شريان متقفلش صح في الجراحه ونزف لحد مانفجر او ميكروب اصاب الجرح و كان مسبب الكحه والسخونيه وبسبب الميكروب ده عمل تاكل للجرح لدرجة الإنفجار فدفع بدم البنت كله مره واحده وتسبب في الوفاه
اشهد الله اشهد الله اشهد الله لم ازود شئ علي اللي حدث ولم إخفي شيئا
وفي النهايه أدعو الله الإ يجرب علي أحد ما أنا فيه
ويعلم المقربون أن مرام كانت هوايا نفسى ونبض قلبي و اشهد الله أنى راضيا بقضاءة”

تعليق واحد لـ ““مرام”حكايه طفله دمياطيه وعمليه اللحميه تجعلها جثه بعد انفجار الدماء من فمها”

  1. بسم الله الرحمن الرحيم
    انا لله وانا اليه راجعون
    اولا انا بعزي والد الطفله ميرام وربنا يصبره ويجعلها شفيعا له ولامها يوم القيامة ان شاء الله

    ثانيا الدكتور علاء بصراحه انا مجربتش عنده عمليات بس بصراحه والله شهيد علي كلامي انا كانت مراتي في خراج في ودنها ولفيت علي دكاتره كتير لحد ما دلوني عليه وربنا جاب الشفا علي ايده بس ما فيش حد ما بيغلتش وربنا يصبركم يارب

إكتب تعليقك